ক'লা উদ্ভিদ
মই তোমাক কিবা ক'ব খুজিও ৰৈ গৈছোঁ
তুমি মোক কিবা ক'ব খুজিও ৰৈ গৈছা
মোৰ ভাষা তোমাৰ ভাষা
এক হৈ পৰিছে হৃদয়ৰ ভাষা
মই তোমালৈ ৰ' লাগি চাই আছোঁ
তুমি মোলৈ ৰ' লাগি চাই আছা
পৰিপূৰ্ণ আমাৰ চকুৰ ভাষা
সন্তুষ্টিৰ আভা
মই মোক এৰি থৈ আহিলো তোমাৰ কাষত
তুমি তোমাক এৰি থৈ গ'লা মোৰ ওচৰত
আমি ইজনে আনজনক লৈ উভতি আহিলো
আবতৰীয়া বৰষুণজাকত তিতি-বুৰি নিসংগ ৰাতি
আমাৰ লগে লগে আহি আছে ক'লা উদ্ভিদবোৰ।
Comments